إكتب كما تنطق إكتب بلسانك،
قالوها و عاودوها، قالولنا إلي احنا شباب تونس معاتش نقراو كتب و إلي لمكتبات فرغت في جرتنا،
و ختمتوها بحكاية منعرفوش نكتبو!
التونسي معاتش يقرى على خاطر لكتب مهاش مكتوبة بلوغتو، التونسي يشيخ كي يقرى بدارجة،
على خاطر لكتاب كي يبدى مكتوب بلوغتو يبدى نديدو و موش بروف تعنيف خشبي يبدى يصبط فيه كلقرنيطة،
الكلمة كي تبدى مكتوبة باللسان تهز لمعنى متاحها الكل، تخضخض قاريهى : تشيخو ، تبكيه و إلى تضحكوا،
التونسي ممكن معاتش يقرى أما راهوا قاعد يكتب. كل يوم برشة يكتبوا على فيسبوكهم و إلى بلوغاتهم, قاعدين يكتبوا
بهاك اللوغة إلي تعيطولهة لهجة و إلى دارجة، لا سيدي اذيكة لغة، لغة قاعدة تنبت عل لورق،
الشباب قاعد يكتب بش يلقى مايقرى، الشباب قاعد يكتب بش يدقدق لغة اللوح،
الشباب قاعد يكتب بش يتحرر و يحرر لوغتو لولة : التونسي.
ثقافة كاملة بش تترسخ، ثقافة جديدة تعيط دقاج للوغة اللوح،
ثورتنا الجديدة، ثورتنا الثانية هي ثورة ثقافية.
