الكف #TnElec

نتائج لنتخابات هبطت. لا عادت فما مفاجأت لا مفاجعات. يزي ما كلينا كفوف، خاصتا بطلوع النهضة، إلي فاتت التوقعات. كمل على هذاك الكل، العريضة ( من أنتم؟) إلي خرجتلنا مل حيط.

بالإختيار هذا، خاصتا عريضة، و لو أن حاليا محل شك، تأكدنا إلي فما شريحة كبيرة من المجتمع مزال ما عندهاش الملكة النقدية. و كركوز كما الهاشمي بجرد تلفزة في لوندرا و برشة قذافية (نسبتا للمعمر القذافي) عداها علاهم. و من شيرت أخرى تجار ألدين، أي حركة النهضة، و إلي يفرقوا في التكبير في كل تحريكة لشيخهم، الشيء إلي يرد الغنوشي، شخصية مقدسة عند البعض، إلي تقول "الشيه" كي يتعدى و تنقز تبوسل جبينو.

الزوز استغلوا سجاذة البعض، الزوز غزروا للشعب بإستحقار، لعدم احترامهم القانون، و عدم احترامهم المواطنة و حتى المبادئ متع الثورة. و هذا نشوفوه في أنهم من أكثر لعباد إلي عملت خروقات في الإنتخابات.

و الأتعس من هذاك الكل التجاوب الكبير إلي لقاوه عند ناخبيهم. الشيء إلي يردنا ساخطين على سذاجة الشرايح هاذي من الناخبين خاصتا أن عددهم كبير برشة. و من فوائد الديمقراطية إلي لصوات الكل كيفكيف. معناها صوت الساذج كيفو كيف صوت المتثقف. هذاك علاش ليوم إلي نصب روحو متتقف على الشعب كلا كف. نحكي على إلي تكبر و حكي مع الشعب مل فوق. نحكي على إلي نسا إلي دور المتثقف ماهوش كان طلب المعرفة أما فوق مل كل نشرها و إلي المثقف دور أن يكون حاضر في المجتمع، حاضر بش يوعي المواطنين. الكف إلي كليناه ، هايل برشة، فهمنا تونس شنية، شعبها شكون و باش حاجتو... فيقنا على تهميش أخر صار، إلي هو تهميش ثقافي و إلي تو باش ننشروا ثقافة الديمقراطية لزمنا نصنعوا ديمقراطية الثقافة. يضهرلي برشة خمو ممكن بش ينضموا لجمعيات مدنية أو يبداو بعمل فعلي على الميدان مع حزب سياسي. حاجة هايلة خاطر تعني إلي الكف عمل مفعول: التوعية بأهمية دمقرطة الثقافة. شمعنها دمقرطة الثقافة؟ أي نشر الثقافة، أي أن المتثقف يولي يكتب بش يفهم لأكبر عدد و لكل الشرايح. أن يتلهى أكثر بنشر المعرفة على خاطر الأولوية هي في تعادل الميزان الثقافي قبل كل شيء. حتى نخلطوا لعدالة ثقافية، أي أن المعرفة تخلط لكل فرد من أفراد الشعب. و عنا وسيلة حاضرة تلمنا، بالرغم إلي فما انقسامات فرنكوفونية و عربوفونية، الوسيلة هاذي هي اللغة التونسية. مهم ياسر أن نستعملوا التونسي لوغتنا متع كل يوم، إلي تصنعت و معجمها تطور على مشاكلنا متع كل يوم بعيد برشة على اللغات لقديمة إلي تعبات بالصور، الأوصاف و بعد معنى كلامها على المكتوب ولى أغلبيتو مقصود، لين اللغة ولات خشبية. نشر المعرفة ينجم يكون بالنزول على الميدان ديركت لتفسير مثلا مفاهيم كيم المواطنة و هذاك يصير مع الجمعيات و زادت بترجمة المعرفة لتونسي، أي أننا المتثقفين يترجموا كتب و علاش لا كتبهم بتونسي. أنك تكتب التونسي، هو أنك تختار لسان تونسي، و بعد قداش من سنا تهميش، بحكم أنك تتكتب بتونسي، تعلي قدر هل اللغة و باللغة تعلي قدر التونسي كإنسان. نحب نكمل بالتذكير أن أوروبا ما خرجت مل القرون الوسطى كان كي المتثقفين متع وقتها، كما إيرازم، فهموا أهميت ترجمة المعرفة للوغة الشعب، و اللغة المتكلمة ولات مكتبوت و خذات بلاصة اللاتينية .هذا صار في أخر القرن 15. شخل أن من بعد هل الحركة الثقافية، إلي هي حركة ترجمة. اللغة المتكلمة قدرها علاء و قدر لعباد علاء بعدلي اللغة هذيكة مكتوبة و مصنوعة من واقع أقرب للعباد متع وقتها. الشيء هذا أنتج تيار ثقافي جديد، تيار إنساني. في تونس و من بعد تمزبيل الإنسان، هذا بش حشتنا ليوم، ترجيع لقدر للإنسان، أعمل طلة على توانسة تحكي و إلى شوفهم على تويتر تو تشوف كيفاش يسبوا بعضهم بأكثر سهولة و في أسرع وقت إذا تقارنهم بشعوب أخرى أكثر تحضر... و هذا موضوع أخر و انشالله فهمتوا الكف.