lundi 7 novembre 2011

لمنصف المرزوقي... بعد تهجمو على الكريول

بعد هل المهزلة
أي لغة سيتكلم العرب القرن المقبل؟
يجيك جواب....
ما فهمت شي إنت من الثورة، مافهمتش إلي تعيطلو الكريول هى اللغة إلي عملت الثورة و خلاتك تجي
لتونس بعد المنفى! اللغة الكريولية، هي إلي خلات وعي بالمجموعة يخرج عند شباب مكانش متسيس، الشيء إلي خالاه حاضر بش يتلم على موقف سياسي من غيير حسابات اديولوجية! كيفاش؟ بالفن راب،
موزيكا، فايسبوك و بلوغوسفار...إلخ
كان تبعت شصار قبل الثورة، راك فهمت برشة حجات، منها الحملات إلي صارو على انترنات كما "نهار على عمار"، "سيب صالح"، "حل بلوغ" و إلي تعملوا بالكريول، الحملات هاذم نحاو الصنسرى على كلمة صنسرى و
نحاو الصنسرة على كلمة "عمار"...
عطاو نوع متع وعي جماعي بالحرية لشريحة من الشباب إلي عمرهم ماشافوا و لا فهموا الحرية، الشي إلي خلا عدد لحرار يزيد... فما الموزيكا زادة إلي تبعت، كما مزيكت بنديرمان و إلى الراب إلي خرج مع الثورة... هما عاونوا برشة و مش شوية في تحرير برشة توانسة... الشيء هذا الكل ما عملش الثورة أما حرثلها ترابها....
برى أعمل طلة على بلوغات توانسة لهنا و اتو تفهم التوانسة بأناهي لغة يحكيو و يكتبوا.
وقتاش تنقصوا من التغريب لمعزوز، من سوسة الناصرية و من السكيزوفرينيا على النشرة الجوية! ما فهمتش إلي لغة الكريول هي اللغة التونسية، ما فهمتش إلي لبلاصة العقلانية الوحيدة للعربية ليوم في تونس، هذا كان مازال عندها بلاصة، هي وزارة الخارجية! ببي مرزوقي ما فهمتش إلي إنت عايش في 2011 و إلا تحب نفكروك في الكلمة الكريولية "DEGAGE"...

dimanche 6 novembre 2011

مالطا تساوي تونس في الإنتاج الثقافي و عندها أكثر من 20 مرة أقل سكان

برشة، اتهموا الشعب بالبهامة من بعد لانتخابات... قلت خليني نعمل طلة فماشي مقياس متع إنتاج ثقافي، فماشي مانعمل فكرة.

طحت بالوثيقة هذي عملتها مؤسسة تخدم مع الأمم المتحدة و لاهية بتطوير دول البحر الأبيض المتوسط.

في الوثيقة هذي فما زوز مقايس متع ثقافة:

- لول يقيس المعدل السنوي متع العناوين (كتب) إلي خرجت على مدة متع 3 سنين.

- الثاني يقيس عدد لفلام الطويلة و القصيرة إلي تعملت في عام.

بخلاف فرنسا و الدول الاوروبية الكبيرة إلي باز هاربين علينا هروب في الثقافة. قلت هيا خليني نغزر لجزر في أوروبا كما مالطا و الشيبر و نقارنها بتونس.

لوجت على تونس، نلقى عندنا عام 1995, 617 من كتاب خرجو ل8 ملاين توانسة وقتها تقريبا، عام 1995.

مالطا فيها قرابة 400000 من ساكن، أكثر من 20 مرة أقل من تونس، نلقى العدد متع الكتب إلي خرجتهم قريب للعدد متاعنا أي 402 كتاب! معناها عندها زوز أثلاث العناوين إلي عنا ل20 مرة أقل سكان.


أما الشيبر ( لإلي ما يعرفهاش، جزيرة في المتوسط في شيرت تركيا و اليونان) فيها قرابة 1,2 مليون ساكن معناها عامة 95 (بحكم أنهم أرقام 1995) عندهم ما بين 8 و 10 مرات أقل من تونس سكان، و مع هذا عندهم 1033, أي مش بعيد على زوز مرات أكثر منا كتب!

فهمتوا علاش الهاشمي الحامدي تعدى؟

برجولية شيء يفجع و لزمنا نتحركو شوية فماشي ما العدد يولي ما خير، و أي واحد مازال يتهم التوانسة بالبهامة و هو ما عندو حتى كتاب، خيرلو يبلع فمو، خاطروا معمل شيء بش يوعي و ينور لعقول.

أقل حاجة كان ينجم يعملها يترجم كتاب موجود لتونسي و يمشي ينشروا... فما مؤسسات نشر توانسة يقبلوا كتب بالتونسي.

و نخليكم على خريطة...


: اجة شارك في إكتب بتونسي لهنا
http://www.planbleu.org/methodologie/idd008.pdf